Ditë më parë, Rahoveci n’Fokus, ashtu siç ka bërë edhe pas vendimit të Themelores, ka shpërndarë një artikull mbi pafajësinë e vëllezërve Bejtullah e Hazër Deliu.
Në po të njëjtin artikull, përmenden edhe persona të tjerë. Për shkak se ne nuk i kemi kontaktuar, ashtu siç na obligon KMShK-ja dhe ligji, jemi të detyruar ta shpërndajmë reagimin publik të njërit prej të apostrofuarve, në atë mënyrë që të mos përballemi me pasoja juridike, por dhe jo vetëm.
Më poshtë edhe mesazhi i ardhur në adresën tonë. I njëjti është publikur pa as më të voglën ndërhyrje.
I nderua,
Ju përshëndes dhe ju uroj punë të mbarë.
Në lidhje me artikullin “Drejtësia në vend: Bejtullah e Hazër Deliu shpallen të pafajshëm”, ku është publikuar deklarimi publik i z. Bejtullah Deliu dhe ku përmendet emri im në një varg pretendimesh të pavërteta, ju lutem që, në funksion të balancimit të informacionit dhe korrektësisë mediatike, të publikoni reagimin tim, i cili është bashkëngjitur këtij email-i në formatin REAGIM PUBLIK.
Reagimi përmban sqarime mbi faktet e ngjarjes në fjalë dhe adreson shpifjet, manipulimet dhe pretendimet e pavërteta që janë bërë ndaj meje dhe punonjësve tjerë. Duke qenë se artikulli juaj ka gjeneruar interesim publik, publikimi i reagimit është i domosdoshëm për të ofruar pamjen e plotë dhe të saktë të situatës.
Ju falënderoj për hapësirën dhe bashkëpunimin.
