Që nga 30 prilli (rrafsh 70 ditë) atëherë kur dihej se KF Rahoveci do të marrë pjesë në një nivel më të ulët garash, klubi ka bërë vetëm dy postime në “Facebook”. Dhe paramendoni, të dy postimet ishin urime. Një për klubin e hendbollit, e për të cilin do të shkruajmë pak më poshtë dhe tjetri për legjendën e gjallë, Vahdet Hoxha, që dje regjistroi ditëlindjen e 72.
Rahoveci n’Fokus përmes burimeve të veta ka arritur të kuptojë se klubi është afër marrëveshjes me një trajner, por që edhe më tutje nuk dëshiron ta bëjë publike. Arsyeja s’dihet.
Në anën tjetër, Lepenci po vijon angazhimin e pashoq, duke ditur se konkurrenca në Ligën e Dytë do të jetë e madhe. Gjithashtu, Dardania e Qyshkut, që edicionin e kaluar për pak s’ia arriti qëllimit, shihet si “arrë e fortë” për sezonin 2025/2026.
Gjithsesi, mbetet të shihet nëse këto ditë do të ketë ndonjë reagim nga klubi bardhekaltër, që me kalimin e viteve po i afrohet qindvjetorit.
Ndërkaq, sa i përket kampionit të padiskutueshëm të hendbollit, gjërat do të marrin kahje javën që vjen. Saktësisht me 15 korrik, sipas një njoftimi edhe të FHK-së, KH Rahoveci do të mësojë kundërshtarin për raundin e dytë kualifikues, pasi në të parin nuk do të marrë pjesë.
Në shortin për 1/64, djemtë e Culës do të jenë bartës, çka do të thotë se do të jenë favoritë për të kaluar në 32 skuadrat më të mira të kompeticionit të tretë për nga rëndësia në sportin e hendbollit në kontinentin e vjetër./Rahoveci n’Fokus
