Përderisa jemi nën frymën zgjedhore të 28 dhjetorit, komunave iu duhet me patjetër t’i konstituojnë kuvendet përkatëse.
Çka do të thotë se kryetarët që fituan zgjedhjet lokale, nuk do të kenë shumë kohë për angazhim në ato qendrore. Një prej tyre do të jetë edhe Smajl Latifi, që nuk do të jetë kandidat për deputet.
Ai do të merret me formimin e ekzekutivit në Rahovec dhe tashmë ka bërë lëvizje para.
Përderisa shefi në detyrë i kabinetit të tij, mbrëmë në një prononcim për Rahoveci n’Fokus tha se nuk mund të flasë asgjë për momentin për shkak se nuk ka ndonjë gjë konkrete rreth koalicionit gjegjës, redaksia jonë ka mësuar nga burime brenda AAK-së se romanca e “krahut të luftës” është në finalizim e sipër dhe se tashmë po diskutohen detajet e fundit.
“Nuk e di se çka do të ndodhë ditëve në vijim. Mund të ketë ndryshime, por aktualisht po diskutohet për Shëndetësinë, Arsimin dhe Urbanizmin. Madje, ata (i referohet PDK-së) po e kërkojnë me ngulm këtë drejtori”.
Ditët e ardhshme mund të jenë vendimtare rreth kësaj çështjeje, ndërsa mbetet të shihet se si do të rrjedhin gjërat. Ajo çka është me rëndësi, ne do t’ju raportojmë në kohë reale për çdo informacion të ri që do të zbarkojë kah ne./Rahoveci n’Fokus
