Klubet rahovecase nuk janë në gjendje aspak të mirë.
Kjo për shkak se subvencionet e autoriteteve komunale, aty ku bazohet shumica dërrmuese e buxhetit nuk pritet të dalin as në muajin maj.
Kështu të paktën ka mësuar Rahoveci n’Fokus nga burime të afërta pranë klubeve kryesore të qytetit.
I gjithë problemi duket të ketë ardhur nga keqmenaxhimi me financat, përkatësisht kontratat kolektive.
Si shkak i padive të shumta që janë shtruar në drejtim të Komunës së Rahovecit, Thesari i ka bllokuar transaksionet.
Përderisa në vitet paraprake paratë e subvencioneve arkëtoheshin në muajin mars, këtë vit klubet morën premtimin se fillimi i majit pritet të jetë vendimtar.
Ndërkaq, zërat e fundit thonë se këto para nuk do të lëshohen as këtë muaj.
E kësaj pritet t’ia shohë sherrin hendbolli në veçanti. Kjo pasi KF Rahoveci e Grapeland kanë mbyllur rrugëtimin për këtë edicion, ndërsa KH Rahoveci javën e ardhshme nis fazën finale të Play Offit.
Nuk duhet harruar as shahun, për të cilin Superliga nis me 24 maj. /Rahoveci n’Fokus
